Varun G J 
ಕೊಚ್ಚಿ: ಮಲಯಾಳಂ(Malayalam) ಚಿತ್ರ ಕಲಾವಿದರ ಸಂಘ (AMMA) ತನ್ನ ಮೂರು ದಶಕಗಳ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಮಹತ್ವದ ಬದಲಾವಣೆಗೆ ಸಾಕ್ಷಿಯಾಗಿದೆ. ಸಂಘದ ಅಧ್ಯಕ್ಷರಾಗಿ ಖ್ಯಾತ ನಟಿ ಶ್ವೇತಾ ಮೆನನ್ ಅವರು ಆಯ್ಕೆಯಾಗಿದ್ದಾರೆ, ಮತ್ತು ಮುಖ್ಯ ಕಾರ್ಯದರ್ಶಿಯಾಗಿ ಕುಕ್ಕು ಪರಮೇಶ್ವರನ್ ಅವರು ನೇಮಕಗೊಂಡಿದ್ದಾರೆ. ಇದು AMMA ಸಂಸ್ಥೆಯಲ್ಲಿ ಮಹಿಳೆಯರು ಇಂತಹ ಉನ್ನತ ಹುದ್ದೆಗಳನ್ನು ಅಲಂಕರಿಸುತ್ತಿರುವುದು ಮೊಟ್ಟಮೊದಲ ಬಾರಿಗೆ!
ಈ ಚುನಾವಣೆ ಹಲವು ಕಾರಣಗಳಿಂದ ವಿಶೇಷ ಮಹತ್ವ ಪಡೆದುಕೊಂಡಿದೆ. ಇತ್ತೀಚಿನ ವರ್ಷಗಳಲ್ಲಿ ಮಲಯಾಳಂ ಚಿತ್ರರಂಗದಲ್ಲಿ ಮಹಿಳೆಯರು ಎದುರಿಸುತ್ತಿರುವ ಕಿರುಕುಳ ಮತ್ತು ಅಸುರಕ್ಷತೆಯ ಆರೋಪಗಳು ತೀವ್ರವಾಗಿ ಕೇಳಿಬಂದಿದ್ದವು. ಹೇಮಾ ಸಮಿತಿಯ ವರದಿಯು ಈ ಸಮಸ್ಯೆಗಳ ಕುರಿತು ಕಳವಳಕಾರಿ ಮಾಹಿತಿಯನ್ನು ಬಹಿರಂಗಪಡಿಸಿತ್ತು. ಇದರ ಬೆನ್ನಲ್ಲೇ ಹಿರಿಯ ನಟ ಮೋಹನ್ಲಾಲ್ ಅವರು ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದು, ಸಂಘದ ನೇತೃತ್ವದ ಬಗ್ಗೆ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿತ್ತು.
ಇದನ್ನೂ ಓದಿ: ಕೃಷ್ಣ ಜನ್ಮಾಷ್ಟಮಿ ವಿಶೇಷ: ಸ್ತ್ರೀಲೋಲ ಎಂದು ಕರೆಸಿಕೊಂಡ ಲೋಕೋದ್ಧಾರಕ
ಆಗಸ್ಟ್ 15 ರಂದು ನಡೆದ ‘ಅಮ್ಮ’ದ ಚುನಾವಣೆಯಲ್ಲಿ ಶ್ವೇತಾ ಮೆನನ್ ಅವರು ದೇವನ್ ಅವರನ್ನು ಮತ್ತು ಕುಕ್ಕು ಪರಮೇಶ್ವರನ್ ಅವರು ರವೀಂದ್ರನ್ ಅವರನ್ನು ಸೋಲಿಸಿ ಈ ಐತಿಹಾಸಿಕ ಜಯ ಸಾಧಿಸಿದ್ದಾರೆ. ವಿಶೇಷವೆಂದರೆ, ಈ ಬಾರಿ ಪ್ರಮುಖ ಪುರುಷ ನಟರು ಸ್ಪರ್ಧೆಯಲ್ಲಿದ್ದರೂ ಮಹಿಳಾ ಅಭ್ಯರ್ಥಿಗಳು ವಿಜಯ ಪತಾಕೆ ಹಾರಿಸಿದ್ದಾರೆ.
ಹಿರಿಯ ನಟರಾದ ಮೋಹನ್ಲಾಲ್ ಮತ್ತು ಮಮ್ಮೂಟ್ಟಿ ಸೇರಿದಂತೆ ಹಲವರು ‘ಅಮ್ಮ’ದಲ್ಲಿ ಮಹಿಳೆಯರ ಪಾತ್ರ ಹೆಚ್ಚಾಗಬೇಕು ಎಂದು ಬಹಿರಂಗವಾಗಿ ಬೆಂಬಲಿಸಿದ್ದರು. ಆರಂಭದಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಲು ಮುಂದಾಗಿದ್ದ ಹಿರಿಯ ನಟ ಜಗದೀಶ್ ಅವರು ನಂತರ ತಮ್ಮ ನಾಮಿನೇಷನ್ ಹಿಂಪಡೆದು ಮಹಿಳಾ ಸ್ಪರ್ಧಿಗಳಿಗೆ ಬೆಂಬಲ ಸೂಚಿಸಿದ್ದು ಗಮನಾರ್ಹ.
ಇತ್ತೀಚೆಗೆ ಶ್ವೇತಾ ಮೆನನ್ ಅವರು ಅಶ್ಲೀಲ ಚಿತ್ರದಲ್ಲಿ ನಟಿಸಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿದ್ದವು. ಈ ಆರೋಪಗಳು ಚುನಾವಣೆಯಲ್ಲಿ ಅವರಿಗೆ ಹಿನ್ನಡೆ ತರಬಹುದು ಎಂದು ಹಲವರು ಭಾವಿಸಿದ್ದರು. ಆದರೆ, ಈ ಎಲ್ಲಾ ಅಡೆತಡೆಗಳನ್ನು ಮೆಟ್ಟಿ ನಿಂತು ಶ್ವೇತಾ ಅವರು ‘ಅಮ್ಮ’ದ ಅಧ್ಯಕ್ಷೆಯಾಗಿ ಆಯ್ಕೆಯಾಗಿರುವುದು ನಿಜಕ್ಕೂ ಸ್ಫೂರ್ತಿದಾಯಕವಾಗಿದೆ.
ಇದನ್ನೂ ಓದಿ: ಮುಸ್ಲಿಂ ಮಹಿಳೆಯರ ವಿರುದ್ಧ ಅವಹೇಳನಕಾರಿ ಹೇಳಿಕೆ: ಯತ್ನಾಳ್ ವಿರುದ್ಧ ಕಾನೂನು ಕ್ರಮ- M B Patil
ಮಲಯಾಳಂ ಚಿತ್ರರಂಗದ ಇತಿಹಾಸದಲ್ಲಿ ಈ ಬೆಳವಣಿಗೆ ಒಂದು ಮಹತ್ವದ ತಿರುವು ಎಂದು ಹೇಳಬಹುದು. ಮಹಿಳೆಯರು ನೇತೃತ್ವದ ಸ್ಥಾನಗಳಿಗೆ ಏರುತ್ತಿರುವುದು ಚಿತ್ರರಂಗದಲ್ಲಿ ಸಕಾರಾತ್ಮಕ ಬದಲಾವಣೆಯ ಮುನ್ಸೂಚನೆಯಾಗಿದೆ. ‘ಅಮ್ಮ’ದ ಹೊಸ ನಾಯಕತ್ವವು ಮಹಿಳಾ ಕಲಾವಿದರ ಹಕ್ಕುಗಳು ಮತ್ತು ಸುರಕ್ಷತೆಗಾಗಿ ಪ್ರಾಮಾಣಿಕವಾಗಿ ಶ್ರಮಿಸಲಿದೆ ಎಂದು ಎಲ್ಲರೂ ಆಶಿಸುತ್ತಿದ್ದಾರೆ.
About The Author
Suddhi Sampada 
arathipatrame 
